Aprendendo a afrontar positivamente os conflitos

Hoxe deu comezo o obradoiro de resolución pacífica de conflitos que Arelar está a impartir en ASPRONAGA, en Oleiros, e que ao longo de 4 sesións permitirá a un grupo de 14 usuarios e usuarias da entidade a reflexionar e aprender a resolver pacificamente os conflitos que poidan xurdir no seu día a día.

Este obradoiro está  impulsado por FADEMGA e que seleccionou a ASPRONAGA como entidade para desenvolver este obradoiro durante un total de 12 horas ao longo destas 2 semanas.

O obradoiro pretende que os usuarios e usuarias da entidade aprendan a entender o que é un conflito, aprender habilidades moi necesarias para o afrontamento positivo dos mesmos e identificar estratexias útiles para xerar alternativas que permitan resolver satisfactoriamente o conflito para ambas partes.

O obradoiro ten unha compoñente moi práctica, e a través de dramatizacións e estudo de casos, abordar dun xeito práctico e vivencial como resolver conflitos que lles tocan na súa realidade cotiá.

 

 

Mellorando as habilidades de comunicación no marco do “Aténdeme-Enténdeme”

O pasado venres tivo lugar unha sesión formativa para as persoas integrantes do programa “Aténdeme- enténdeme”, e que pretendeu mellorar as súas competencias comunicativas de cara a preparar as presentacións dirixidas ao persoal sanitario dos centros de saúde. Estas exposicións teñen como obxectivo mellorar a esfera comunicativa do persoal sanitario á hora de atender a doentes con discapacidade intelectual ou do desenvolvemento, identificando problemáticas que acontecen e achegando outros modos de actuación que sexan máis satisfactorios.

Na sesión formativa participaron 8 equipos de outras tantas entidades (conformados por usuarios e usuarias, familiares e persoal técnica de cada entidade) que participan do “Aténdeme-enténdeme” e que amosaron moito interese nos diferentes contidos abordados ao longo da sesión formativa, incidindo sobre todo na autodiagnose de cada equipo en canto as súas competencias comunicativas, e o afrontamento práctico de mensaxes concretas a trasladar ao persoal sanitario de cada centro de saúde.

Esta sesión formativa terá continuidade unha vez as diferentes equipas do “Aténdeme-enténdeme” teñan avanzado na preparación das súas exposicións.

 

O teatro foro como ferramenta transformadora

Ven de iniciarse no CIFP Fontecarmoa o proxecto de teatro foro para a abordaxe de problemáticas socioeducativas nos centros de educación secundaria de Vilagarcía de Arousa. O Proxecto pretende que o alumnado aborde e reflexione sobre problemáticas como o racismo, o acoso escolar ou as drogodependencias a través desta metodoloxía escénica transformadora, que permite que o alumnado desenvolva as competencias socioemocionais necesarias para afrontar as diferentes problemáticas definidas en cada peza de teatro foro.

Outra das fortalezas do proxecto reside en que o alumnado está a implicarse na creación dun recurso didáctico de gran potencialidade para a sensibilización do alumnado ao redor dos seus propios centros de interese e inquedanzas, de forma que empodera ao alumnado no proceso creativo e escénico como axentes de convivencia.

En definitiva, o teatro foro, que é a técnica de dramatizacion máis coñecida do teatro do oprimido de Augusto Boal, permite abordar situacións de opresión e transformalas en situacións de convivencia, dende o rol activo do alumnado como espect-actores e espect-actrices.

O proxecto é impulsado pola Concellaría de Benestar do Concello de Vilagarcía de Arousa e coordinado por Arelar que se encarga de todo o proceso organizativo e a execución técnica do mesmo.